TNLA hpe nra sharawng ai lam shawa n-gun madun

KIA Masat (11) Dap Ba, Masat (12) Dap Dung ginra kata nga ai, TNLA hpyen hpung hpe ginra masha ni nra sharawng ai lam, June shata 21 ya shani shawa n-gun madun ai lam galaw ai hpe chye lu ai.

TNLA hpyen hpung ni Myit Sung mare masha ni hpe modo langai hpyi ai hta mare masha ni hku nna, dangdi dangdep ai hte Myen gumhpraw sen (300) jan nga modo langai mari ya ai hpe TNLA kawn sen (1000) mi nga modo hte mari galai ya na matu, atik anang hpyi ai hta mare shasha ni ndang hkam ai majaw, shawa n-gun madun ai re lam, ginra masha ni kaw na chye lu ai.

Mare masha ni shawa n-gun madun ai hta gumshem lailen lang ai TNLA hpyen hpung hpe nra sharawng ai lam, marawn jahtau lam hkawm n-gun madun ai re hpe chye lu ai.

Ndai zawn shawa n-gun madun nga yang, TNLA hpyen hpung ni du wa nna, pat hkum ai lam ni galaw ai hta matut nna gara hku naw byin wa na hpe sagawn nga ding yang re.