Man Win mare hta Wa ana zinli byin ai majaw, Wa 200 jan sisum mat
Nmau Ginwang Ginjaw, KIA Masat (11) Dap Ba ginra, Man Win mare kata hta Wa ana zinli byin ai majaw, Wa 200 jan sisum mat sai lam, ginra masha ni tsun ai kaw na chye lu ai.
“Ndai June shata praw kaw nna, Wa ana grau byin wa ai, htinggaw mi hta 20, 30 rem da ai ni mung langai pi nngam hkra si ma sai. Nhpa ana re mahtai nchye lu ai. Laiwa sai shaning ni hta mung byin ai raitim, dai ning na daram sawng ai lam gaw nnga ga ai” nga nna Man Win kaw nga ai salang langai tsun ai.
Laiwa sai sten ni hta gaw, dusat hte seng ai sara ni, Wa ana makawp maga tsi hkan htu ya ai ni nga ai ya gaw kadai htu ya ai lam nnga sai, tinang na tinang shawoi hkan htu ai baw tsi ni mari htu tim mai ai lam nnga ai lam, salang wa matut tsun ai.
Ya byin nga ai Wa ana kumla gaw, shat nkam sha ai, hpum taw mat ai, kan mare ai, akau gaw hkyi chyat chyat ai, gari tsap mat nna lagaw hpe dawm ka aw da ai zawn re ni byin ai, bat mi daram machyi ai hte si mat ai re lam chye lu ai.
Wa sat dut ai nkau ni gaw, Wa machyi ai shiga na jang manu hkyamsa ai hte mari la nhtawm, sat dut ai zawn re ni nga ai raitim, kadai hkum pat ai lam mung nnga ai majaw, ana byin ai Wa shan mari sha hkrup nna masha hta mung kap bra ana byin wa na hpe myit tsang nga ai lam, ginra masha ni tsun ai kaw na chye lu ai.
