Nmawk ginra hta gasat gala majan matut byin nga
KIA Masat (3) Dap Ba, Masat (15) Dap Dung, Nmawk ginra hta KIA hte gumshem Myen hpyen dap ni gasat gala majan matut byin ai lam chye lu ai.
Nmawk ginra hta dap jung nga ai, gumshem Myen hpyen dap Hk.M.Y (437) hpyen hpung ni hpyen shamu shamawt pru wa hpe KIA pawng hpawm hpyen hpung ni June shata 25 ya shani gap gasat ai kaw nna, kalang bai gasat gala majan byin wa ai re lam, lit nga ai salang ni kaw na chye lu ai.
Gasat gala majan byin ai aten gumshem Myen hpyen dap ni nbungli bawm, Rocket ni hte wa gap gasat ai sha n-ga, Manmaw kawn, Manje de gumshem Myen hpyen dap ni hpyen n-gun htu shadut ai lam ni galaw nga ai hpe chye lu ai.
Matut nna Hpakant ginra hta mung, June shata 25 ya shani gumshem Myen hpyen dap ni hpyen shamu shamawt hkawm nga ai aten, KIA pawng hpawm hpyen hpung ni hte ang katut gasat gala majan byin ai hta gumshem Myen hpyen dap maga na si, hkala law ai re hpe matut chye lu ai.
