Gumshem Myen hpyen dap a laknak kaba hkrat kapaw ai majaw mungshawa marai 6 asak si sum

Lashio Muklum kata gumshem Myen hpyen dap ni gap dat ai laknak kaba hkrat kapaw ai majaw, mungshawa marai (6) asak si sum mat ai lam chye lu ai.

July shata praw 3 ya jahpawt hkying 8:00am aten daram hta gumshem Myen hpyen dap ni gap dat ai laknak kaba si, Lashio Muklum daw (1) na nta langai hta hkrat kapaw ai majaw, dai nta masha marai (6) tup asak si sum mat sai re lam, lit nga ai salang ni kaw na chye lu ai.

Asak si sum mat sai nta masha ni gaw, Jan. Mahkaw Ma Ji hte kasha Ma Gam yanla, kasha Ma La, dai kaw jawng wa lung nga ai la kasha langai hte shata 8 daram re kashu langai yawng marai (6) re hpe chye lu ai.

Ya aten asak si sum mat sai nta masha ni hpe garum kahtau hpung ni kaw nna, Lashio mungshawa tsi rung, moimang ni hpe ga lajang ai shara de htaw mat wa sai lam chye lu ai.

Lashio ginra makau grup yin ni hta gumshem Myen hpyen dap hte laknak lang rawt malan hpung ni hpyen masa shaja hkat nga ding yang rai nna, gasat gala majan mung byin nga ai hta gumshem Myen hpyen dap kawn, laknak kaba hkrup mara gap shadam bun nga ai lam matut chye lu ai.