Myitkyina Putao lam gyi ai majaw mungshawa ni laiwa laisa yakhkak nga

Lai wa sai June shata 29 ya shani kawn marang htu kaba sawng nga ai majaw, Myitkyina hte Putao lam kaba gyi ru mat nna, mungshawa ni laiwa laisa yakhkak hkrum nga ai hpe chye lu ai.

Myitkyina kawn Putao de lung wa ai lam kaba Tayang Zup, N-htan Zup hte Layen Bum Run mare ni hta lam gyi ru mat ai majaw, Putao de malu masha hte kaga lang rung lang rai ni htaw shalai la na matu nmai mat ai hta ginra mungshawa ni yakhkak hkrum nga ai lam, ginra masha ni kaw na chye lu ai.

Laiwa sai shata 3 daram Myitkyina Putao lam gan pat tawn da ai majaw, Putao hta kun rai manu ni grai rawt mat ai rai nna, ya na zawn lam bai gyi ru mat ai hta ginra masha ni hte laiwa laisa mungshawa ni mi na hta grau yakhkak hkrum nga ai hpe chye lu ai.

Ndai zawn lam gyi ru mat ai hpe bai gram lajang yang, shata mi daram na ai hpang she shawoi na zawn bai hkawmsa lu na rai nna, lam sha n gram lajang kau yang Putao ginra maga de nga ai mungshawa ni naw yakhkak nga na re hpe chye lu ai.