Masha sat da hkrum ai moi mang lahkawng bai mu
Waimaw ginra hta masha sat da hkrum ai moi mang lahkawng hpe bai mu ai lam chye lu ai.
July shata 11 ya jahpawt hkying 5:00am aten daram, Waimaw ginra hta nhtu nhkyi hte galun sat da hkrum ai, moi mang lahkawng hpe laiwa laisa mungshawa ni mu hkrup ai re lam, ginra masha ni kaw na chye lu ai.
Sat da hkrum ai moi mang lahkawng a ntsa kaw ရှမ်းနီတရားစီရင်ရေး laika pa mara da ai rai nna, gadai sat kau da ai re hpe atsawm hkrak nchye lu shi ai rai nhtawm, moi mang hpe မွန်မြတ်လူမူကူညီရေးအသင်း ni kawn, Waimaw tsi rung kaba de htaw mat wa sai re lam, ginra masha ni matut tsun ai.
Lai wa sai June shata 30 ya shani hta mung, Myitkyina Muklum kata ရှမ်းနီတရားစီရင်ရေး laika shakap da let, mungshawa lahkawng sat hkrum ai mabyin ni byin lai wa sai re.
