Nam San Yang mare hta KIO lawu tsang jawng hpaw
KIO Ginjaw Hpaji Dap kaw nna woi awn let, Nam San Yang mare hta lawu tsang jawng hpe hpaw sharin taw nga sai lam chye lu ai.
Jawng hpaw ai hte seng nna, Nam San Yang Ginwang Daw Hpaji Du, Sara Kaba Lahtaw Zau San tsun ai hta mare na ma ni a hpaji lam nhpang hkrat na matu, Ginjaw Hpaji Dap kawn ladat shaw let jawng hpe hpaw sharin hpang nga sai re, nga tsun ai.
Nam San Yang jawng gaw, dai ning kaw na tara shang shanglawt jawng re majaw, jawngma n-gun hte sara n-gun hpe shingdaw rai hpaw ai re, ndai ahkying aten gaw kalang bai gaw gap hpang ai hta n-ga, ya she nnan anhte bai uphkang wa ai re majaw, lawu tsang jawng masat let hpaw hpang wa ai lam re, nga nna Sara Kaba matut tsun ai.
Nam San Yang jawng hta Nam San, Hka La, Npawn, Hpun Le Yang hkan na ma ni hte ni nawn ai mare kahtawng hkan na ma ni sharin hkamla nga sai hta ya aten mayak amyu myu a majaw, nawku hpung wang kata kaw sharin hpang nga sai lam chye lu ai.
Laiwa sai ten Myen mung asuya kaw nna lapran tsang jawng hku hpaw sharin wa sai rai nna, dai ning kawn shanglawt jawng hku masat let hpaw sharin hpang nga sai hta jawngma yawng marai (80) rai sai hte sharin shara marai (10) hte sharin hpang nga sai lam chye lu ai.
