Nmawk ginra hta gasat gala majan matut byin nga

KIA Masat (3) Dap Ba, Nmawk ginra hta KIA hte gumshem Myen hpyen dap ni July shata 15 ya shani kaw nna 16 ya shani du hkra, gasat gala majan matut byin nga ai lam chye lu ai.

Manmaw kawn Nmawk maga de hpri gang modo ni hte hpyen n-gun htu shadut lung wa ai, gumshem Myen hpyen dap hte KIA pawng hpawm hpyen hpung ni gasat gala majan, laja lana bai matut byin nga ai lam, lit nga ai salang ni kaw na chye lu ai.

Nmawk Deng-6, Deng-7 hte Je Ing mare makau ni hta gasat gala majan byin nga ai rai nna, gumshem Myen hpyen dap kawn laknak kaba hkrup mara gap shadam bun ai lam ni galaw nga ai hpe chye lu ai.

Laiwa sai March shata praw 7 ya shani kaw nna, KIA hte gumshem Myen hpyen dap lapran numdaw kalang bai gasat gala majan laja lana bai byin wa ai hta Nmawk, Manje hte Waimaw ginra ni hta ya aten du hkra, hpyen masa naw shaja hkat nga ding yang re hpe chye lu ai.