Sinli ginra kaw gumshem Myen hpyen dap nbungli bawm wa jahkrat bun

Mungmyit Sinli Ga (Kachin Sub-state) ginra, Sinli mare kaw gumshem Myen hpyen dap ni nbungli bawm wa jahkrat bun ai lam chye lu ai.

July shata 18 shana daw hkying 5:00pm aten, Sinli gat grup yin kaw gumshem Myen hpyen dap ni nbungli bawm wa jahkrat bun ai majaw, mungshawa asak si, hkala hkrum ai lam nga ai hpe ginra masha ni kaw na chye lu ai.

Sinli ginra hta gasat gala majan byin ai lam nnga ai kaw, ya na zawn nbungli bawm wa jahkrat bun ai hta Sinli gat hten za mat nna, mungshawa marai kade asak si sum, marai kade hkala hkrum ai lam tup hkrak nchye lu shi ai re.

Gumshem Myen hpyen dap ni gaw, mungshawa law law nga ai nawku jawng, hpaji jawng, tsi rung hte gat pa shara ni hpe madung tawn let, bawm wa jahkrat bun ai lam ni ding yang ngu na galaw nga ai hpe chye lu ai.

Laiwa sai July shata 12 ya shani hta mung, Sinli mare na laika sharin jawng kaw gumshem Myen hpyen dap a nbungli bawm shara (2) hta wa hkrat kapaw ai majaw, mungshawa asak si sum, hkala hkrum ai lam ni byin lai wa sai re.