Namhpakka kaw Shanglawt Asuya Balik Rung hpaw

Dingda Ginwang Ginjaw Namhpakka Muklum kaw, Wunpawng Mungdan Shanglawt Asuya Balik Makan Dap Rung hpaw sa wa sai lam chye lu ai.

Namhpakka Muklum kata shimlum lam hte tara masa rap ra lam lu na matu yaw shada let, Wunpawng Mungdan Shanglawt Asuya Balik Makan Dap Rung hpe July shata 26 ya shani kaw nna, hpaw sa wa sai re lam, lit nga ai salang ni kaw na chye lu ai.

Namhpakka Muklum kaw laiwa sai February shata praw 7 ya shani kaw nna, balik magam gun ni du nga sai raitim, hpyen masa, mungmasa lam amyu myu a majaw, rung hpaw akyu hpyi hpawng hpe July shata 26 ya shani she lu galaw la lu ai re lam chye lu ai.

Wunpawng Mungdan Shanglawt Asuya Balik Makan Dap hpe laiwa sai 2003 ning June shata praw 6 ya shani kaw nna, nnan hpaw hpang wa ai re hpe matut chye lu ai.