Gumshem Myen hpyen dap shara lahkawng hpe KIA ni htim gasat
KIA Masat (1) Dap Ba ginra kata, dap jung shara jahkrat nga ai, gumshem Myen hpyen dap shara lahkawng hpe KIA ni htim gasat nga ai lam chye lu ai.
Myitkyina, Sumpra Bum lam ntsa, Tayang Zup hte Nsawp Zup mare kaw dap jung nga ai, gumshem Myen hpyen dap shara lahkawng hpe KIA pawng hpawm hpyen hpung ni, August shata praw (1) ya jahpawt hkying 7:00am aten daram kaw nna htim gasat nga ai lam, lit nga ai salang ni kaw na chye lu ai.
Gasat gala majan byin nga ai hta phone internet line nlu ai majaw, ya aten hpyen masa gara hku naw rai nga ai hpe nchye lu shi ai hta n-ga, laiwa sai May shata praw 4 ya shani hta mung, KIA pawng hpawm hpyen hpung ni Sumpra Bum kaw dap jung nga ai, gumshem Myen hpyen dap hpe htim gasat zing madu la lu sai re.
Matut nna Nmawk, Manje ginra ni hta KIA hte gumshem Myen hpyen dap lapran hpyen masa shaja hkrat nga ding yang rai nna, gasat gala majan mung matut naw byin nga ai re lam chye lu ai.
