Ginjaw Ginra grup yin gumshem Myen hpyen dap nbungli bawm wa jahkrat
Ginjaw Ginra Laiza makau grup yin hta gumshem Myen hpyen dap ni nbungli bawm wa jahkrat bun ai lam chye lu ai.
August shata praw 8 ya jahpawt jau hkying 1:00am aten daram hta Ginjaw Ginra makau grup yin rai nga ai, Mai Sak Pa hte Munglai Hkyet mare ni hta gumshem Myen hpyen dap ni Jet Fighter, Y-12 nbungli hte bawm wa jahkrat bun ai lam, ginra masha ni kaw na chye lu ai.
Mai Sak Pa mare grup yin hta nbungli bawm 10 lang daram wa jahkrat bun ai hta Salang. Malang La San a dum nta hte nawku jawng wang chyinghka, hpungtau ni nga ai dum nta ni hten za mat ai rai nna, ma hkum hte re hpawmi langai mung, hkra maga lagaw lahtin kaw hkra hkala la ai lam, ginra masha ni tsun ai.
Munglai Hkyet kaw hkrat kapaw ai hta mungshawa hkra hkala ai lam nga nnga nchye lu shi ai rai nna, matut nna mung Myo Tit, Kunglaw hte Numlang maga de nbungli bawm wa jahkrat bun ai hta mungshawa hkra hkala ai lam nga nnga sagawn nga ding yang re.
Gumshem Myen hpyen dap ni gaw hpyen masa, mung masa lam amyu myu hta hkrat sum nga sai re majaw, nbungli hpe madung dat let mungshawa ni law malawng nga ai shara ni hkan, bawm wa jahkrat bun ai lam ni ding yang ngu na galaw nga ai hpe chye lu ai.
