Chihpwi, Pang Wa P.T.Ts ni hpyen laja lana rim lahkawn nga

Chihpwi hte Pang Wa ginra dap jung nga ai, P.T.Ts hpyen hpung ni hpyen laja lana rim lahkawn nga ai lam chye lu ai.

July shata htum wa maga kaw nna gumshem Myen hpyen dap n pu, Chihpwi hte Pang Wa kata na Zahkung Ting Ying woi awn ai, P.T.Ts hpyen hpung ni, laiwa laisa mungshawa ni hpe laja lana hpyen rim lahkawn nga ai lam, ginra masha ni kaw na chye lu ai.

P.T.Ts hpyen hpung ni gaw laiwa laisa mungshawa ni hpe lam kaw hkap nga nna lahkawn ai sha n-ga, Pang Wa kata nta di di sa lahkawn ai hte ga sau htu dabang hkan na ramma ni hpe rim lahkawn nga ai re lam, ginra masha matut tsun ai.

Laiwa sai July shata 29 ya shani hta Chihpwi kaw na deng 6 tsan ai, ga sau bungli dabang langai kaw na ramma marai 6 hte Hpimaw, Pang Wa sa lam numbraw kaw laiwa ai ramma marai 4 hpe lahkawn mat ai sha n-ga, August shata praw 5 ya shani hta mung, Pang Wa kaw na ga sau htu dabang hkan na ramma marai 20 jan hpe rim lahkawn mat ai re lam chye lu ai.

Rim lahkawn da lu ai ramma ni hpe P.T.Ts hpyen hpung ni kawn, hkrun lam hkawm modo ni hta kalang mi marai 2, 3 rai, Myitkyina M.P.Hk de sa taw ai lam chye lu ai.

Ya na zawn P.T.Ts hpyen hpung ni hpyen laja lana rim lahkawn nga ai lam gaw, majan sum nga ai gumshem Myen hpyen dap hpe n-gun jat ya lu hkra, lahkawn nga ai re hpe chye lu ai.