Gumshem Myen hpyen dap shara lahkawng hpe KIA ni htim gasat
KIA Masat (9) Dap Ba, Hpakant ginra hta dap jung nga ai, gumshem Myen hpyen dap shara lahkawng hpe KIA ni htim gasat nga ai lam chye lu ai.
August shata 14 ya jahpawt hkying 3:00am aten daram kaw nna, Hpakant ginra Taw Maw hte La Mawng gumshem Myen hpyen dap hpe KIA pawng hpawm hpyen hpung ni htim gasat nga ai lam, lit nga ai salang ni kaw na chye lu ai.
Gasat gala majan byin nga ai shara de, Hpakant Byuha kawng kaw nna gumshem Myen hpyen dap ni laknak kaba gap garum ya ai hte nbungli hte mung, gap gasat ai lam nga ai hta ya aten hpyen masa gara hku naw rai nga ai hpe sagawn nga ding yang re.
Matut nna Nmawk ginra ni hta mung, KIA hte gumshem Myen hpyen dap lapran gasat gala majan laja lana matut byin nga ai hta gumshem Myen hpyen dap gaw, hpyen dap nhkrat sum hkra nbungli hpe madung tawn let, gap gasat nga ding yang re hpe chye lu ai.
