(46) ning hpring amyu shayi masat ninghtoi hpawng galaw
Sinpraw Ginwang Ginjaw, Mai Ja Yang Muklum kaw (46) ning hpring Wunpawng Mungdan Shanglawt Amyu Shayi masat ninghtoi hpawng lamang hpe August shata 19 ya jahpawt hkying 8:00am aten hta galaw la lu sai lam chye lu ai.
Hpawng lamang hta Wunpawng Mungdan Shanglawt Amyu Shayi Hpung Ginjaw Komiti Ningbaw a shatsam mungga hpe Sinpraw Ginwang Ginjaw, Amyu Shayi Hpung Ningtau Ningbaw Hpm. Nhkum Hkawn Nan kaw nna hti shalai ya ngut ai hpang, magam gun ladaw 10, 20, 30 ning hpring sai magam gun ni hpe shagrau sha-a ai lam galaw ai hpe amyu shayi magam gun langai tsun ai.
Magam gun ladaw 10 ning hpring sai marai (9) hpe gumhpraw kachyi, 20 ning hpring sai marai (3) hpe ja ta chyawp, 30 ning hpring sai marai (2) hpe gaw, ja lap mi hte gumhpraw tsen sumshi jaw ai rai nna, amyu shayi laika ngau ka ai ni hpe mung, shagrau sha-a ai lam galaw ai hpe chye lu ai.
Amyu shayi masat ninghtoi hpawng lamang hpe Wunpawng Mungdan shara shagu kaw galaw ai rai nna, laiwa sai aten ni hta mungshawa law law hte galaw ai lam nga ai raitim, ya aten mung masa hpyen masa amyu myu a majaw, nlu galaw ai re lam chye lu ai.
Wunpawng Mungdan Shanglawt amyu shayi hpung hpe laiwa sai, 1978 ning August shata (19) ya shani, Pajau Shalawt Yang ngu ai shara hta Wunpawng Mungdan Shanglawt Hpung kaw nna, hpaw masat shagrin da sai hta 2024 ning August shata (19) ya shani hta (46) ning hpring sai re lam chye lu ai.
