Laiza makau grup yin Bus modo hte htaw wa htaw sa galaw nga
Wunpawng Mungdan Shanglawt Asuya, Mungchying Uphkang Dap kaw nna, lam masan ya ai hte maren, Laiza makau grup yin Bus modo hte htaw wa htaw sa ai lam galaw nga ai hpe chye lu ai.
September shata praw 2 ya shani kaw nna, Laiza Muklum makau grup yin hta shanu nga ai mungshawa ni manu hkyem sa ai hte hkawm sa hkawm wa lu na matu, Bus modo hte htaw wa htaw sa ai lam galaw nga sai re.
Bus hte htaw wa htaw sa galaw ai a yaw shada lam hpe Laiza Muklum Uphkang Du, Salang Kaba Labau Bawm Kyang tsun ai hta
“Ya asuya Bus line tawn ai ngu ai gaw manu hkyem sa ai hku na hkawm sa hkawm wa lu na matu yaw shada ai, raitim ya ntsa tsang kaw na Bus mali tang da ai, dai rai nhkrat shi ai laman gaw D.G.A kaw nga ai modo hpe jahpawt hkying 7:30am kaw nna, Laiza- Ga Ra Yang, shani hkying 1:00pm kaw nna, Laiza- Myo Tit, Kung Law lam hkawm na, Asuya line Bus ngu masat da ai majaw, masha ndu tim mung, aten du jang modo pru hkawm mat wa na” nga nna tsun ai.
Line Bus manu masat ai hta Laiza- Daw Hpum Yang du hkra Myen gumhpraw 2500ks, Laiza- Myo Tit 5000ks, Laiza- Gang Dau Yang 2500ks, Laiza- Ga Ra Yang 5000ks hte htaw wa htaw sa ai lam galaw nga ai hpe chye lu ai.
Bus modo daru hpe Laiza Munglai hka mahkrai pawt, golf shaman shara kaw masat da ai rai nna, du wa na shaning ni hta gaw Laiza- Mai Ja Yang du hkra Bus modo hte hkawm sa hkawm wa lu na matu masing jahkrat da ai lam ni nga ai re hpe chye lu ai.
Lai wa sai August shata 30 ya shani Bus htaw wa htaw sa hte seng nna, ndau laika shapraw da sai lam ni nga ai hta September shata praw 2 ya shani kawn, ta tut hkrang shapraw nga sai re lam chye lu ai.
