Namhkam Muklum kata nbungli bawm hkrat kapaw

Namhkam Muklum kata, gumshem Myen hpyen dap ni gap dat ai, nbungli bawm wa hkrat kapaw ai lam chye lu ai.

September shata praw 6 ya jahpawt manap jau hkying 1:30am aten daram hta gumshem Myen hpyen dap ni Namhkam Muklum kata kaw nbungli bawm wa jahkrat bun ai majaw, mungshawa si hkala hkrum nna, dum nta ni htenza mat ai lam, ginra masha ni kaw na chye lu  ai.

Nbungli bawm wa hkrat kapaw ai hta mungshawa marai 11 asak si sum ai hte marai 11 hkala hkrum ai rai nna, dum nta ni mung htenza mat ai re lam chye lu ai.

Gumshem Myen hpyen dap ni gaw lam amyu myu hku nna, sum machyi nga sai majaw, mungshawa law law nga ai shara ni hta ya na zawn nbungli bawm wa jahkrat bun ai lam ni ding yang ngu na galaw nga ai hpe matut chye lu ai.