Seng Tawng mare kaw gumshem Myen hpyen ni nbungli hte wa gap gasat
KIA Masat (9) Dap Ba ginra, Hpakant Seng Tawng mare kaw September shata 19 ya shana maga hkying 2:15pm aten daram hta gumshem Myen hpyen ni Jet nbungli hte bawm wa jahkrat, gap gasat ai lam chye lu ai.
Nbungli bawm gaw, Seng Tawng mare lawk (3) hte Chyaudwi Taung mayan kaw wa hkrat kapaw ai hta mungshawa dum nta hten mat nna, mungshawa hkra hkala ai lam gaw n chye lu shi ai lam, Seng Tawng ginra masha ni kaw na chye lu ai.
Hpakant Dapnu (Tatma) kawng kaw dung ai gumshem Myen hpyen ni hkrup mara gap shadam dat ai laknak kaba si gaw, Sabaw mare mungshawa dum nta kaw wa hkrat kapaw ai majaw, mungshawa marai (2) hkala hkrum ai sha n-ga dum nta mung hten za mat ai lam, ginra masha ni kaw na chyu lu ai.
Hpakant Seng Tawng mare kaw September shata praw 7 ya shani kaw nna, KIA pawng hpawm hpyen hpung ni hte gumshem Myen hpyen ni shani shagu ngu na gasat gala majan matut byin nga ai re.
September shata 19 ya jahpawt hkying 4:00am aten daram hta mung, Sinna Dingda Ginwang Ginjaw, Ga Hkyeng Bum Ginwang, Zupra mare na lahta tsang jawng mayan kaw gumshem Myen hpyen ni nbungli bawm wa jahkrat bun ai majaw, jawngma marai 1 hkala hkrum ai lam, ginra shiga lawk kaw na chye lu ai.
