Hpakant Byuha kawng hpe KIA ni gap gasat

Hpakant kaw dap jung nga ai gumshem Myen hpyen dap Byuka kawng hpe KIA ni laknak kaba hte gap gasat nga ai lam chye lu ai.

September shata 20 ya shani hkying 1:00pm aten daram kaw nna, Hpakant Byuha kawng hpe KIA ni laknak kaba hte gap gasat nga ai lam, lit nga ai salang ni kaw na chye lu ai.

Hpakant Byuha kawng gaw gasat gala majan byin ai shara shagu de laknak kaba ni hte gap garum ya nga ai sha n-ga, mungshawa ni nga ai shara de mung, laknak kaba hkrup mara gap shadam bun nga ai shara re majaw, KIA ni gap gasat nga ai lam na chye lu ai.

Hpakant ginra hta KIA hte gumshem Myen hpyen dap ni gasat gala majan matut byin nga ai hta gumshem Myen hpyen dap kawn, nbungli bawm laknak kaba ni hte hkrup mara gap bun nga ai majaw, dai ginra na mungshawa ni hpyen koi yen nga ra ai re hpe chye lu ai.

Matut nna KIA ni padang dip la lu sai Nmawk ginra de mung, gumshem Myen hpyen dap ni hpyen n-gun htu shadut nna, hpyen shamu shamawt nga ai lam chye lu ai.