Seng Tawng mare kaw gumshem Myen hpyen dap ni nbungli bawm matut jahkrat bun
KIA Masat (9) Dap Ba ginra, Hpakant Seng Tawng mare kaw gumshem Myen hpyen dap ni nbungli bawm matut wa jahkrat bun ai lam chye lu ai.
September shata 27 ya shani hkying 3:55pm hte 4:30pm aten laman hta Hpakant Seng Tawng Yu Ma lung seng gat lawk kaw gumshem Myen hpyen dap ni nbungli bawm numdaw lahkawng lang wa jahkrat bun ai sha n-ga, Rocket hte mung wa gap bun ai lam, ginra masha ni kaw na chye lu ai.
Lai wa sai September shata 12 ya shani kaw nna, Hpakant Seng Tawng ginra hta KIA hte gumshem Myen hpyen dap ni gasat gala majan matut byin nga ai hta gumshem Myen hpyen dap ni gaw, nbungli bawm laknak kaba ni hte shani shagu ngu na gap gasat ai lam ni galaw nga ai re.
Ya na zawn nbungli bawm laknak kaba ni hte gap gasat nga ai majaw, dai ginra na mungshawa ni si hkala hkrum ai hte dum nta ni hten za hkrum nga ai re.
Matut nna Manmaw, Nmawk Deng (7) ginra de mung, gumshem Myen hpyen dap ni nbungli bawm, laknak kaba ni hte shani shagu ngu na gap gasat nga ai lam chye lu ai.
