Chihpwi ginra hta dap jung ai gumshem Myen hpyen dap hpe KIA zing
KIA Masat (7) Dap Ba, Chihpwi ginra kata hta dap jung nga ai gumshem Myen hpyen dap shara ni hpe KIA ni zing madu la lu sai lam chye lu ai.
September shata 29 ya jahpawt hkying 5:00am aten daram kaw nna, Chihpwi ginra kata hta dap jung nga ai, gumshem Myen hpyen dap shara ni hpe KIA ni htim gasat wa ai hta Chihpwi Byuha kawng hte Balik dap, Deng 4 grup yin dap jung nga ai gumshem Myen hpyen dap ni hpe padang dip la lu sai lam, lit nga ai salang ni kaw na chye lu ai.
Chihpwi ginra kata na gumshem Myen hpyen dap ni hpe KIA pawng hpawm hpyen hpung ni kalang ta htim gasat wa ai hta nkau shara ni hpe padang dip la lu sai rai nna, naw ngam nga ai dap shara ni hpe matut htim gasat nga ai lam chye lu ai.
Manmaw Nmawk ginra ni hta mung, gumshem Myen hpyen dap ni kawn, nbungli bawm laknak kaba ni hte shani shagu ngu na gap gasat ai lam galaw nga ai rai nna, hpyen n-gun htu shadut shamu shamawt nga ai hpe matut chye lu ai.
