Lashio Muklum kata nbungli bawm matut jahkrat bun

Lashio Muklum kata gumshem Myen hpyen dap ni nbungli bawm kalang bai matut wa jahkrat bun ai lam chye lu ai.

October shata praw 4 ya jahpawt hkying 2:13am hte 5:20am aten laman, Lashio Muklum kata gumshem Myen hpyen dap ni pawng 500 ngu maram lu ai nbungli bawm, mali lang wa jahkrat bun ai lam, ginra masha ni kaw na chye lu ai.

Daw 5 hte daw 8 lawk kaw wa hkrat kapaw ai hta miwa hpungkyi jawng hte mungshawa dum nta ni hten za mat ai rai nna, mungshawa si hkala ai lam nga ai hpe mung chye lu ai.

Gumshem Myen hpyen dap ni gaw laiwa sai August shata kawn, Lashio Muklum kata shani shagu ngu na nbungli bawm wa jahkrat bun nga ai hta mungshawa asak si hkala hkrum ai hte dum nta ni mung hten za hkrum nga ai lam chye lu ai.

Lashio ginra gaw MNDAA wuhpung ni padang dip zing tawn da ai shara rai nna, ya aten gasat gala majan byin ai lam nnga ai kaw gumshem Myen hpyen dap ni mara kata nbungli bawm shani shagu ngu na wa jahkrat bun ai lam ni galaw nga ai hpe matut chye lu ai.