Myen hpyenla ni, mungmasha marai lahkawng hpe lata adup daw ya

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 34 ) ginra kaw shamu shamawt nga ai Myen hpyen dap, Dapnu ( 77 ) kata na hpyenla ni, August praw 9 ya shani, Mandung IDP camp na salang Gumtung Naw asak 60 ning hte salang Zau Seng yan hpe lata adup daw ya ai lam, buga salang langai kawn chye lu ai.

Mabyin hte seng nna dai salang wa tsun ai gaw, “Mandung Hpahka jak kaw Myen hpyenla ni sa sawk jep ai shaloi lauban ni lang ai RT ga shaga jak ding sa langai mu nna dai kaw nga ai marai 6 hpe san jep adup zing ri ai hta Salang Gumtung Naw a pai lata lahpum daw mat ai, Salang Zau Seng gaw loi sawng ai majaw ga lajang ra ai madang re” nga nna tsun ai.

Machyi hkrum ai salang yan gaw ya aten Lashio tsi rung kaw tsi tsi hkamla nga ai lam chye lu ai.

Dai ginra ni hta Myen hpyen ni kawn ya na zawn, mungmasha ni hpe mara kata jahkring hkring rim jep shatsang nga ai lam salang wa matut tsun ai kawn chye lu ai.