P.T.Ts nkau KIA maga laknak jahkrat

Kanpaiti hte Pang Wa ginra lapran na P.T.Ts nkau, KIA maga de laknak jahkrat sa pawng ai lam nga ai hpe chye lu ai.

October shata 23 ya shani Kanpaiti hte Pang Wa ginra lapran, Tamu Hkung mare kaw na P.T.Ts nkau laknak jahkrat nna, sinat laknak arung arai hte hpawn KIA maga de sa pawng mat ai lam, lit nga ai salang ni kaw na chye lu ai.

Ndai P.T.Ts ni gaw Pang Wa hpe KIA pawng hpawm hpyen hpung ni htim gasat wa ai hta hprawng makoi mat ai ni rai nna, Pang Wa hpe padang dip zing la lu ai hpang, KIA maga de laknak jahkrat sa pawng mat ai re lam chye lu ai.

Pang Wa ginra hpe KIA pawng hpawm hpyen hpung ni October shata 18 ya shani gasat zing la lu sai rai hta sinat laknak arung arai ni hpe mung padang dip la lu ai re.