BGF (1001) dap hpe KIA matut zing
Gumshem Myen hpyen dap n-pu, BGF (1001) dap hpe KIA ni matut zing madu la lu sai lam chye lu ai.
October shata 31 ya shana maga hkying 7:00pm aten daram hta Hpimaw ginra kaw dap jung nga ai, gumshem Myen hpyen dap n-pu, jarit sin hpyen hpung BGF (1001) dap hpe KIA pawng hpawm hpyen hpung ni gasat zing madu la lu sai lam, lit nga ai salang ni kaw na chye lu ai.
BGF (1001) dap hpe October shata 30 ya shani kaw nna, KIA pawng hpawm hpyen hpung ni htim gasat wa ai hta 31 ya shana maga zing madu la lu sai lam chye lu ai.
Gumshem Myen hpyen dap n-pu, Salang. Zahkung Ting Ying woi awn ai, BGF (1002) hte (1003) dap hpe KIA pawng hpawm hpyen hpung ni gasat zing la lu ai hpang, (1001) dap hpe bai zing madu la lu ai re lam chye lu ai.
Ya aten Salang. Zahkung Ting Ying a uphkang ginra ni hta dap jung nga ai, BGF hte P.T.Ts dap shara ma hkra ngu na hpe KIA pawng hpawm hpyen hpung ni gasat zing madu la lu sai re lam matut chye lu ai.
