Hpakant, Seng Tawng mare kaw nta 11 wan hkru mat
Hpakant ginwang Seng Tawng mare lawk ( 2 ) Shan Kung kaw August 16 dai hpawt hkying 5:30am aten hta nta 11 wan hkru mat ai lam chye lu ai.
Wan hkru hpang ai gaw, Nga dut ဒိုင္ galaw ai ဦး ရန္ႏုိင္ထြန္း a nta kaw wan jak sharawt da ai hta, wan sumri kawn hkru hpang wa ai rai nna, wan hkru ai kade nna yang, wan sat dap modo hte company hkan na Back-hoe hka htaw modo ni du wa ai majaw, hkying 7:30am aten hta wan n-gun shazim kau lu ai lam, buga na salang langai kawn chye lu ai.
Ndai shara gaw, nta shap sha ai, gat seng dut ai hte gun rai law law htun da ai shara mung re, wan kaw hkru lawm mat ai gun rai manu ntsam lam sawn yang, sen tsa kaba rai na re lam, salang wa tsun dan ai.
Wan hpyen hkrum ai mungmasha ni hpe lit nga ai asuya salang ni kawn Seng Tawng lawk ( 1 ) Bunggyi jawng kaw shara jahkrat da ya ai lam, wan hkru hpang ai nta madu ni hpe seng ang ai asuya Balik ni kawn ahkyak la da ai lam na chye lu ai.
