KIO hpung shang salang ni a hkrumzup bawngban hpawng galaw
Sinpraw Ginwang Ginjaw, KIO hpung shang salang ni a hkrumzup bawngban hpawng hpe galaw la lu sai lam chye lu ai.
November shata 25 ya shani hkying 10:00am aten, Mai Ja Yang Muklum kata na, KIO hpung shang salang ni a hkrumzup bawngban hpawng hpe Mai Ja Yang Muklum kaw galaw la lu sai lam, salang langai tsun ai.
Hpawng lamang hta Mai Ja Yang Muklum Pati Komiti Tingnyang Up, Salang Hpauyam Tang Nau kaw nna, shatsam n-gun jaw ga tsun ai hta
“Mai Ja Yang Muklum pati komiti gaw grau nna greng grak wa u ga, grau nna awng dang ai hpung shang masha tai wa nna, anhte Wunpawng Mungdan Shanglawt Hpung grau nna galu kaba wa hkra, madi shadaw tai lu ai pati salang ni rai wa u ga” nga nna tsun ai.
Hkrumzup bawngban hpawng hta Mai Ja Yang Muklum pati komiti shamu shamawt lam ni hta woi awn lu na matu Ningbaw, Amu Madu ni hte hpaji jaw salang ni hpe lata san ai lam ni hpe mung, galaw la lu sai lam chye lu ai.
Matut nna hpawng lamang hta lawk shagu na hpung shang salang ni, Dakkasu shagu na hpung shang salang ni yawng marai (30) shanglawm ai hte galaw la lu sai lam chye lu ai.
