Manmaw ginra Myen hpyen dap shara nkau hpe KIA zing
KIA Masat (3) Dap Ba, Manmaw ginra dap jung nga ai gumshem Myen hpyen dap shara nkau hpe KIA ni zing madu la lu sai lam chye lu ai.
December shata praw 4 ya jahpawt hkying 7:00am aten daram hta Manmaw ginra kata dap jung nga ai, Hk.L.Y (47) dap a makawp dap, ဖန်းခါးကုန်း hte ညောင်ပင်သာ dap hpe KIA pawng hpawm hpyen hpung gasat zing madu la lu sai lam, shawnglam lit nga ai salang ni kaw na chye lu ai.
Manmaw hte Manje ginra ni hta dap jung nga ai, gumshem Myen hpyen dap shara ni hpe KIA pawng hpawm hpyen hpung ni dai hpawt hkying 5:00am aten daram kaw na laja lana htim gasat wa ai hta ဖန်းခါးကုန်း hte ညောင်ပင်သာ dap hpe shawng zing madu la lu ai re lam chye lu ai.
Matut nna Manmaw, Manje ginra dap jung nga ai, gumshem Myen hpyen Hk.M.Y (319), Hk.M.Y (601) hte AMT (523) myawk dap ni hpe mung, KIA pawng hpawm hpyen hpung ni matut manoi htim gasat nga ai lam chye lu ai.
