Sabaw maw kaw hkum pup nawng gyi ru

Hpakant Sabaw maw kaw hkum pup nawng gyi ru wa ai majaw, mungshawa dum nta htinggaw (50) daram lup mat ai lam chye lu ai.

January shata 13 ya jahpawt hkying 1:00am aten daram hta Hpakant Sabaw maw kaw hkum pup nawng kalang ta gyi ru wa ai majaw, dai ginra na mungshawa dum nta htinggaw (50) daram lup mat ai hte mungshawa asak si sum ai lam nga ai hpe ginra masha ni kaw na chye lu ai.

Hkum pup nawng gyi ru wa ai hta asak si sum ai mungshawa moi mang nkau hpe lu tam la sai raitim, marai kade asak si sum hkala hkrum ai lam tup hkrak nchye lu shi ai re.

Hpakant ginra hta ga shingbut gyi, hkum pup nawng gyi ai lam ni jahkring hkring byin nga ai sha n-ga, hka kaba ai lam ni a majaw, mungshawa asak si sum ai lam law sai hte dum nta ni mung htenza hkrum ai lam law law byin lai wa sai hpe chye lu ai.