Mazut roi rip sat hkrum ai saranum yan (10) ning hpring sai raitim, teng man ai mahtai nlu

KBC laika sasana saranum yan mazut roi rip sat kau hkrum ai (10) ning hpring sai raitim, ten man ai mahtai kaja nlu shi ai hpe chye lu ai.

Saranum Maran Lu Ra hte Saranum Tangbau Hkawn Nan Tsin yan gaw, laiwa sai 2015 ning January shata 19 ya shani, Mungmau Ginwang, Kawnghka mare kaw gumshem Myen hpyen dap ni a lata hta mazut roi rip sat kau hkrum ai rai nna, dai ni January shata 19 ya shani hta (10) ning hpring sai raitim, teng man ai mahtai kaja nlu shi ai re.

Ndai zawn mazut roi rip sat kau hkrum ai manghkang hte seng nna, dai ni du hkra teng man ai mahtai kaja nlu shi ai raitim, lit nga ai salang ni hku nna, mahtai kaja lu hkra matut shakut nga ding yang re hpe chye lu ai.

Laiwa sai aten saranum yan a myit dum akyu hpyi hpawng hpe KBC Ginjaw kawn woi awn let, mungshawa law law hte shaning shagu galaw wa ai raitim, 2023 ning kaw nna masa lam amyu myu a majaw nlu galaw mat ai lam chye lu ai.