Indaw ginra gasat gala majan byin nga

Sagaing jarit Indaw ginra kaw KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam chye lu ai.

January shata 27 ya jahpawt hkying 5:00am aten daram kaw nna, Indaw ginra gumshem Myen hpyen dap shara hpe KIA, KPDF pawng hpawm hpyen hpung ni htim gasat wa ai kaw nna, gasat gala majan byin nga ai lam, lit nga ai salang ni tsun ai.

Gasat gala majan byin nga ai hta gumshem Myen hpyen dap shara nkau hte makawp dap nkau hpe KIA, KPDF pawng hpawm hpyen hpung ni zing madu la lu sai rai nna, naw ngam nga ai dap shara nkau hpe matut naw htim gasat nga ai majaw, gasat gala majan naw laja nga ai lam chye lu ai.

Gumshem Myen hpyen dap maga na mung, hpyen dap shara ni nhkrat sum hkra, nbungli drone ni hte gap gasat nga ai sha n-ga, Indaw mare kata de mung bawm jahkrat gap gasat nga ai majaw, mungshawa dum nta law law hten za hkrum nga ai lam chye lu ai.

Matut nna Manmaw ginra hta mung, KIA pawng hpawm hpyen hpung ni hte gumshem Myen hpyen dap ni gasat gala majan matut laja nga ai lam chye lu ai.