Gumshem Myen hpyen dap ni nbungli, laknak kaba hte gap gasat

Gumshem Myen hpyen dap ni nbungli bawm, laknak kaba ni hte hkrup mara gap shadam bun ai lam chye lu ai.

February shata 10 ya shana hkying 11:30am aten daram hta M.P.Hk gumshem Myen hpyen dap ni, Mali Hka sinpraw hkran maga de, nbungli hte shawng bawm wa jahkrat bun nna, laknak kaba (20) jan lang matut manoi gap shadam bun ai lam, ginra masha ni tsun ai.

Matut nna hkying 11:20am aten daram hta mung, Tada-U kaw nna rawt lung wa ai gumshem Myen hpyen dap nbungli, Waimaw ginra Lamyang Nam Wa maga de bawm wa jahkrat bun ai lam chye lu ai.

Manmaw ginra hta mung, KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai hta gumshem Myen hpyen dap ni gaw gasat gala majan nbyin ai shara ni hta raitim, nbungli drone laknak kaba ni hte gap gasat ai lam ni galaw nga ai hpe chye lu ai.