Myitkyina maza bum kaw num kasha langai a moi mang hpe mu
Myitkyina maza bum kaw sat nna kabai tawn da ai num kasha langai a moi mang hpe mu ai lam chye lu ai.
March shata praw 4 ya jahpawt hkying 7:30am aten daram hta Myitkyina, Njang Dung အထက (6) jawng shawng na maza bum kaw sat nna plastic hte kayawp kabai tawn da ai, num kasha langai a moi mang hpe mu ai lam, ginra masha ni kaw na chye lu ai.
Sat hkrum ai num kasha a hkum hkrang hta adup zingzi ai ningma hkang ni hte rai nna, hpa baw amyu sha re, galoi kaw na sat hkrum sai, kadai sat ai lawng lam hkum zup hpe nchye lu ai re.
Ndai sat hkrum ai num kasha a moi mang hpe Myitkyina hkye mawoi wuhpung ni kawn, Myitkyina tsi rung ga kadoi lajang shara kaw sa tawn da sai lam chye lu ai.
Myitkyina Muklum kata laiwa sai March shata praw 1 ya shani hta mung, Shatapru lawk kaw num kasha langai hpe nhtu hte kahtam sat kau ai mabyin ni byin lai wa sai sha n-ga, Muklum kata lagu lagut, mya lu mya la ai lam ni jahkring hkring byin nga ai hpe chye lu ai.
