Je Yang dabang na ma marai (3) hpe sat kau ai tara hkam hpe si ari jaw

Je Yang hpyen yen dabang kaw na ma marai (3) hpe sat kau ai tara hkam hpe si ari tara aming jahkrat kau sai lam chye lu ai.

Ma num kasha marai (3) hpe mara kata sat kau ai tara hkam, Salang Ung Sau Doi Awng hpe Penal Code Section 302, I (B), 201, 364, 375, 377, 386 ndai Section (6) hte March shata (29) ya shani, laksan tara rung kaw nna tsaw dik ai mara ari (si ari) aming dawdan jahkrat kau sai lam, lit nga ai salang ni tsun ai.  

Ndai manghkang gaw laiwa sai February shata 22 ya shani, Je Yang dabang kaw na Mung Seng Yang mare de sa wa ai, ma num kasha marai (3) hpe lam lapran kaw, Salang Ung Sau Doi Awng rim woi mat nna, mara kata sat kau ai amu manghkang re.

Salang Ung Sau Doi Awng gaw, shawng de ladaw galu htawng ari hkamla laiwa sai sha n-ga, Shanglawt Hpyen Dap hta mung hpyen tara tawt lai nna, shapraw kau hkrum yu sai re hpe matut chye lu ai.