Lawa mare de Myen hpyen dap ni nbungli hte ding yang gap gasat nga

Danai Ledo lam Lawa mare de gumshem Myen hpyen dap ni nbungli hte ding yang ngu na gap gasat nga ai lam chye lu ai.

April shata 20 ya jahpawt hkying 6:00am aten daram hta mung, Myitkyina kaw na rawt lung wa ai, gumshem Myen hpyen dap nbungli Lawa mare grup yin kaw bawm wa jahkrat gap gasat ai lam, ginra masha ni kaw na chye lu ai.

Lawa mare hta gumshem Myen hpyen dap hte P.T.Ts pawng hpawm hpyen hpung ni hpyen shamu shamawt nga ai majaw, KIA hte gasat gala majan jahkring hkring byin nga ai sha n-ga, gumshem Myen hpyen dap ni kaw nna mung, nbungli hte ding yang wa gap gasat nga ai lam chye lu ai.

Matut nna gumshem Myen hpyen dap hte P.T.Ts pawng hpawm hpyen hpung ni April shata 15 ya shani, Lawa mare na nta 100 jan hpe wan nat jahten kau ya ai rai nna, ya aten dai ginra na mungshawa ni hpyen koi yen hkawm nga ai lam chye lu ai.