Hpakant ginra hta Myen hpyen dap ni nbungli hte gap gasat
Hpakant ginra hta gumshem Myen hpyen dap ni nbungli hte wa gap gasat ai majaw, mungshawa dum nta hten za hkrum ai lam chye lu ai.
May shata praw 6 ya shani hkying 10:30am aten daram hta Myitkyina Hpakant lung wa lam, Seng Hpra hte Kap Maw mare kaw gumshem Myen hpyen dap ni nbungli hte bawm lahkawng lang wa jahkrat bun ai majaw, mungshawa dum nta ni hten za mat ai lam, ginra masha ni kaw na chye lu ai.
Hpakant ginra hta gumshem Myen hpyen dap hte P.T.Ts pawng hpawm hpyen hpung ni April shata htum wa maga kaw nna, hpyen n-gun htu shadut nga ai majaw, KIA ni hte shani shagu ngu na gasat gala majan byin nga ai sha n-ga, nbungli hte mung wa gap gasat ai lam ni galaw nga ai hpe chye lu ai.
Manmaw ginra hta mung KIA pawng hpawm hpyen hpung ni hte gumshem Myen hpyen dap ni gasat gala majan byin ai shata 5 jan sai hta gumshem Myen hpyen dap ni gaw nbungli, drone ni hte shani shagu wa gap gasat nga ai lam matut chye lu ai.
