Hpakant lam hta majan matut byin nga

KIA Masat (9) Dap Ba ginra, Hpakant lung wa lam hta gasat gala majan matut byin nga ai lam chye lu ai.

May shata praw 8 ya shani du hkra, Myitkyina Hpakant lung wa lam, Seng Hpra hte Kap Maw mare lapran kaw KIA pawng hpawm hpyen hpung ni hte gumshem Myen hpyen dap pawng hpawm hpyen hpung ni gasat gala majan matut byin nga ai lam, lit nga ai salang ni kaw na chye lu ai.

Gasat gala majan byin nga ai hta gumshem Myen hpyen dap ni nbungli, drone ni hte gap gasat nga ai majaw, mungshawa dum nta ni hten za hkrum nga ai lam chye lu ai.

Gumshem Myen hpyen dap hte P.T.Ts pawng hpawm hpyen hpung ni gaw, April shata htum wa maga kaw nna, Hpakant ginra de hpyen n-gun kaba hte htu shadut wa ai majaw, shani shagu ngu na majan byin nga ai lam chye lu ai.

Manmaw ginra hta mung, KIA pawng hpawm hpyen hpung ni hte gumshem Myen hpyen dap ni shani shagu gasat gala majan matut byin nga ai hta gumshem Myen hpyen dap kawn nbungli, drone ni hpe madung tawn let, ninghkap gap gasat nga ding yang re ai lam matut chye lu ai.