Ningbaw Kaba Usa a hkum tsawp moi mang hpe makoi mayang ai lam galaw
Wunpawng Mungdan Shanglawt Kongsi, Ningbaw Kaba Usa a hkum tsawp moi mang hpe May shata 17 ya shani, Laiza Muklum kaw makoi mayang ai lam galaw ai hpe chye lu ai.
Ningbaw Kaba Usa, Salang Kaba Lanyaw Zawng Hra asak (87) ning gaw, May shata 15 ya shani mungkan ga na ana zingli a majaw, madu yesu hta yup pyaw mat wa sai re.
Ningbaw Kaba Usa gaw laiwa sai 1963 ning August shata praw 8 ya shani, Wunpawng mungdan shanglawt hpyen dap de du shang wa nna, 2006 ning June shata 21 ya shani kaw nna, 2018 January shata praw 1 ya shani du hkra, Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw Kaba, Wunpawng Mungdan Shanglawt Hpyen Dap, Dap Up Daju magam lit hpe kangka ai hte gun hpai lai wa sai lam chye lu ai.
Laika hpaji hpe Sumpra Bum kaw English asuya lawu tsang jawng hta tsang (3) du hkra sharin la nna, Myitkyina K.B.S jawng kaw tsang (4) kawn tsang (10) du hkra sharin awng la nhtawm, 1960 ning hta Yangon dakkasu kaw B.A (Political Science, Sociology, Psychology) hpe sharin la sai lam chye lu ai.
Matut nna Ningbaw Kaba Usa gaw 1964 ning hta Sumpra Bum Ginwang Ningtau Uphkang Du, 1969 ning kaw nna 1975 ning du hkra, DGA Lithkam, 1976 ning kawn 1994 ning du hkra Ninggawn Amu Madu, 1994 ning kaw nna 2006 ning du hkra, KIO Ginjaw Komiti Tingnyang Up Malai magam lit ni hpe mung gun hpai laiwa sai lam chye lu ai.
