Gumshem Myen hpyen ni mare de laknak kaba gap bun ai majaw, mungshawa marai 2 asak sisum nna, marai langai hkala hkrum
Namawn kaw dap jung shara jahkrat nga ai, gumshem Myen hpyen Hk.M.Y (389) dap ni gaw, mare de laknak kaba hte hkrup mara gap shadam ai majaw, mungshawa marai 2 asak sisum nna, marai 1 hkala hkrum ai lam chye lu ai.
Gumshem Myen hpyen ni gap dat ai laknak kaba si gaw, Nawhkum Bum Ginwang Daw, Nawmawk Ninghtawn, Hepa mare na Salang Chan Moung yan la nga ai nta kaw wa hkrat kapaw ai majaw, lahkawng yan dai shara kaw asak sisum mat ai lam, ginra shiga lawk kaw na chye lu ai.
Asak sisum mat ai yan la gaw, Salang Chan Moung Asak (62) ning hte madu jan Daw Khin Pyung Asak (58) ning yan rai nna, Daw Tin Nuq Asak (50) ning gaw lagaw lahkawng maga hkala hkrum, ya aten ni nawn ai tsi rung de tsi tsi hkamla na matu shalai dat sai lam, ginra masha ni tsun ai.
Dai ni May shata 24 ya jahpawt hkying 9:30am aten kaw nna, KIA Masat (26) Dap Dung ginra, Sanun Kawng maga de mung, gumshem Myen hpyen hte Samhkyeng SNA pawng hpawm hpyen hpung ni hte KIA pawng hpawm hpyen hpung ni gasat poi matut byin ai lam chye lu ai.
