Waimaw ginra de Myen hpyen dap ni hpyen n-gun htu shadut ai lam ding yang galaw nga

Waimaw ginra de gumshem Myen hpyen dap ni hpyen n-gun htu shadut shamu shamawt ai lam ding yang galaw nga ai hpe chye lu ai.

May shata 20 jan kaw na Waimaw, Lamyang maga de gumshem Myen hpyen dap hte P.T.Ts pawng hpawm hpyen hpung ni hpyen n-gun kaba hte kalang bai htu shadut nga ai lam, lit nga ai salang ni kaw na chye lu ai.

Ndai zawn hpyen n-gun bai htu shadut wa ai majaw, KIA hte gasat gala majan ni byin nga ai raitim, shani shagu ngu na hpyen n-gun jat bang nga ding yang re ai lam chye lu ai.

Matut nna Hpakant ginra de htu shadut nga ai gumshem Myen hpyen dap hte P.T.Ts pawng hpawm hpyen hpung ni ya aten, Hpakant ginra de du shang shara la nga sai rai nna, hpyen shamu shamawt ai lam ding yang galaw nga ai majaw, gasat gala majan laja lana byin wa na hpe dai ginra na mungshawa ni hkrit tsang nga ai lam chye lu ai.