Hepa mare kaw gasat gala majan byin
KIA Masat (9) Dap Ba, Masat (26) Dap Dung ginra Hepa mare makau kaw gasat gala majan byin nga ai lam chye lu ai.
June shata praw 4 ya shana daw hkying 5:00pm aten daram kaw nna, Hepa mare makau de gumshem Myen hpyen dap ni htu shadut sa wa ai majaw, KIA ni hte gasat gala majan byin nga ai lam, lit nga ai salang ni shana wa ai kaw na chye lu ai.
Hepa mare kaw gasat gala majan byin nga ai hta Hepu mare kaw gumshem Myen hpyen dap ni Jet nbungli hte bawm wa jahkrat gasat ai hta mungshawa dum nta langai hten za mat ai raitim, masha hkra hkala ai lam hpa nnga ai hpe chye lu ai.
Ya aten Hpakant ginra hta gumshem Myen hpyen dap hte P.T.Ts pawng hpawm hpyen hpung ni hpyen n-gun htu shadut, shamu shamawt ai lam ni ding yang galaw nga ai majaw, gasat gala majan laja lana matut byin wa na hpe ginra masha ni hkrit tsang nga ai re.
