Wunpawng amyusha ni hpyen yen tsin yam hkrum ai (14) ning ladu hkrum
June shata praw 9 ya shani gaw, Wunpawng amyusha ni hpyen yen tsin yam hkrum sha ai shaning (14) ning hpring ladu hkrum ai nhtoi rai nga ai.
2011 ning June shata praw 9 ya shani kawn, gumshem Myen hpyen dap hte KIA ni gasat gala majan numdaw kalang bai byin wa ai kaw nna, Wunpawng amyusha ni hpyen koi yen ai shaning (14) ning hpring ladu hkrum sai re.
Hpyen yen tsin yam hkrum ai (14) ning hpring ladu hkrum, June (9) lamang hpe Jinghpaw mung kata hpyen yen dadang ni hte nawku hpung shara nkau hta akyu hpyi n-gun la ai lamang ni galaw ai zawn, mai gan mungdan shara nkau hta mung, hpyen yen alu tam ai lamang ni hpe galaw ai re lam chye lu ai.
Ndai zawn hpyen koi yen nga ai hta gumshem Myen hpyen dap gaw, 2021 ning January shata hta Myen mungdan a daru magam ahkang aya hpe bai madu zing kau ai kaw nna, Myen mungdan ting ntara ai mazut gumshem ai lai len hpe ninghkap gasat ai mung, (5) ning maga de rai wa sai re.
