Hpakant kaw gasat gala majan matut byin nga
KIA Masat (9) Dap Ba, Hpakant ginra hta gasat gala majan matut byin nga ai lam chye lu ai.
June shata 17 ya jahpawt hkying 9:00am aten daram kaw nna, Hpakant Mawsiza kaw shara la nga ai gumshem Myen hpyen dap pawng hpawm hpyen hpung ni hte KIA ni gasat gala majan byin nga ai lam, lit nga ai salang ni tsun ai.
Gasat gala majan byin nga ai hta Mazup Yang kaw shara la nga ai gumshem Myen dap ni gap dat ai laknak kaba si, Kate maw mungshawa dum nta langai kaw wa hkrat kapaw ai majaw, nta masha marai (3) hkala nna, dum nta ni mung hten za mat ai lam chye lu ai.
June shata 16 ya shani hta mung, Maw Wan kaba hte Maw Wan kaji lapran kaw gumshem Myen hpyen dap, P.T.Ts pawng hpawm hpyen hpung ni hte KIA ni gasat gala majan byin ai lam chye lu ai.
Hpakant ginra hta ndai laman shani shagu ngu na gasat gala majan byin nga ai hta gumshem Myen hpyen dap ni laknak kaba hkrup mara gap shadam bun ai majaw, mungshawa si hkala hkrum ai sha n-ga dum nta ni mung hten za hkrum nga ai re.
