Kasung, Zup Mai mare mungshawa ni chyeju shakawn wunli la akyu hpyi hpawng galaw
Kasung, Zup Mai mare na mungshawa ni hte shinggan manam hku du sa ai, KBC, RCM nawku hpung woi sara ni, PCG, ၾကက္ေၿခနီ, na myit su salang ni yawng marai 1000 jan hte, August 25 ya shani hta Kasung mare hpaji jawng wang Ninggawn Htingram Gawknu kaw, chyeju shakawn wunli la akyu hpyi hpawng galaw la lu sai lam, Kasung mare a ningtau up hkang salang Dashi La Jawng tsun dan ai kawn chye lu ai.
Wunli la akyu hpyi hpawng galaw ai gaw, kalang kabai da sai mare buga de bai lu wa ai lam gaw, Karai Kasang a chyeju san san sha rai nga ai, dai hpe chyeju shakawn wunli la ai akyu hpyi hpawng galaw ai lam re, nga nna salang wa tsun ai.
Ninghtoi 11 ya kabai da ai Kasung, Zup Mai mare dum nta hkan na arung arai nkau mat mat ai, bai nna nawku jawng hkan pala wa hkra ai mare makau na hkauna law malawng gaw, Nga, Dumsu ni sha kau ya ai lam ni nga ai.
August 11 ya shani Kasung mare kata de majan byin wa ai majaw, Namti Lambraw Yang de hpyen yen hku nna nhtoi 11 ya wa nga mat ai raitim mung, KBC, RCM, nawku hpung shagu na kanu kawa ni hte PCG na myit su salang ni hku nna, mare de bai wa lu na matu, asuya lahkawng maga de bawngban jahkrup nhtawm, August 22 ya shani Kasung, Zup Mai mare de bai wa lu ai lam hpe chye lu ai.
