Myen hpyen dap ni nbungli, laknak kaba hte hkrup mara gap gasat nga
Gumshem Myen hpyen dap ni nbungli, laknak kaba ni hte hkrup mara gap gasat nga ai lam chye lu ai.
June shata 22 ya shana hkying 10:40pm aten daram hta Hpakant tatma kawng kaw dap jung nga ai, gumshem Myen hpyen dap ni gasat gala majan byin ai lam nnga ai raitim, laknak kaba hte hkrup mara gap shadam bun ai lam, ginra masha ni kaw na chye lu ai.
Waimaw ginra Lamyang hte Washawng grup yin maga de mung, gasat gala majan byin ai lam nnga ai sha, June shata 22 ya shana hkying 10:00pm aten daram hta Myitkyina kaw na rawt lung wa ai, gumshem Myen hpyen dap nbungli hte bawm wa jahkrat gap gasat ai lam ni galaw ai hpe chye lu ai.
Gumshem Myen hpyen dap ni gaw ya aten, Hpakant hte Waimaw ginra ni hta hpyen n-gun htu shadut ai lam ding yang galaw nga ai sha n-ga laknak kaba, nbungli ni hte hkrup mara gap gasat nga ai majaw, mungshawa si hkala hkrum ai hte dum nta ni mung hten za hkrum nga ai re.
