Myen hpyen dap ni, laiwa laisa mungmasha ni hpe shagyip shagyeng galaw ai majaw buga masha ni yak hkak nga

KIA Dap Ba ( 2 ), Dap Dung ( 14 ) ginra, Nawngmi mare baw D.K.Ts hpyen dap dingsa kaw shagyit ( Gate ) galaw nna dung ai, Myen hpyen dap Hk.L.Y ( 298 ) na hpyen hpung ni, August 26 ya shani kaw na laiwa laisa mungmasha ni hpe laklai ai hku sawk jep nga ai lam na chye lu ai.

Mungmasha num ni hpe gaw, Myen hpyenla magam gun jan ni sawk jep ai lam galaw nga ai. Shagyit ( Gate ) hpe jahpawt hkying 6:00am hta hpaw nna, shana maga hkying 5:00pm hta pat kau ai lam chye lu ai.

Nawngme mare masha ni gaw, yi sun hkauna sa yang, dai lam hpe lai di ra ai, ya aten hta hkauna mam hkai nga ai aten mung re. Myen hpyen dap kawn ya na zawn aten masat lam pat ai hpe galaw ai majaw, mare masha ni yi sun hkauna sa ai hta yak hkak ai lam ni byin nga ai, nga nna Nawngme mare na salang langai kawn chye lu ai.