Hpakant ginra Myen hpyen dap ni nbungli hte matut gap gasat nga
Hpakant ginra hta gumshem Myen hpyen dap ni nbungli hte matut gap gasat nga ding yang re ai lam chye lu ai.
July shata 15 ya shani hkying 11:40am aten grup yin hta Hpakant Mawmau Bum hte Mawmau Layang maga de gumshem Myen hpyen dap ni nbungli hte bawm wa jahkrat nna, jak sinat hte mung wa gap gasat nga ai lam, lit nga ai salang ni tsun ai.
Bawm wa jahkrat gap gasat ai hta mungshawa hkra hkala ai lam nga nnga hpe rai nchye lu shi ai hte Waimaw Lamyang grup yin hta mung, hkying 1:40pm aten daram hta Myitkyina kaw na rawt wa ai gumshem Myen hpyen dap nbungli hte bawm wa jahkrat bun ai lam nga ai hpe chye lu ai.
July 14 ya shani hta mung Mawmau Bum kaw gumshem Myen hpyen dap ni nbungli hte wa gap gasat ai majaw, hpaji jawng langai htenza mat ai lam nga sai re.
Matut nna July shata 14 ya jahpawt hkying 9:00am aten daram kaw nna, KIA Masat (9) Dap Ba, Masat (26) Dap Dung ginra rai nga ai, Mai Nawng kaw KIA hte gumshem Myen hpyen dap ni laja lana gasat gala majan byin nga ai hte Mawwan kaba hte Mawwan kaji kaw mung, shani ka-ang aten daram kaw nna laja lana gasat gala majan byin nga ai lam chye lu ai.
Hpakant ginra hta ya aten gumshem Myen hpyen dap pawng hpawm hpyen hpung ni hte KIA pawng hpawm hpyen hpung ni gasat gala majan laja lana matut byin nga ai hta gumshem Myen hpyen dap ni gaw nbungli, drone ni hte gap gasat nga ding yang re ai majaw, dai ginra na mungshawa ni hpyen koi yen nga ai re.
