Jinghpaw mung kata phone internet line pat tawn ai laning mi du sai hta mungshawa ni lam amyu myu hku yakhkak hkrum nga

Jinghpaw mung kata gumshem Myen hpyen dap ni phone internet line pat tawn da ai laning mi hpring sai hta mungshawa ni lam amyu myu hku yakhkak hkrum nga ai lam chye lu ai.

Laiwa sai 2024 ning July shata 21 ya shani kaw nna, gumshem Myen hpyen dap ni Jinghpaw mung kata Mytel, Ooredoo, MPT hte Telenor zawn re matut mahkai phone internet line pat tawn da ai, dai ning 2025 July 21 ya shani laning mi hpring sai hta mungshawa ni lam amyu myu hku yakhkak hkrum nga ai re.

Ya aten Myitkyina, Hpakant Muklum hte kaga Muklum shara nkau hta phone line lu ai raitim, law malawng shara ni hta nlu shi ai rai nna, internet line gaw nlu shi ai re lam chye lu ai.

Muklum shara nkau hta gaw, star link wifi hpe madung shakap lang nga ai raitim, gumhpraw jaw na sa lang ra ai majaw, gumhpraw nlu ai ni a matu phone internet line lang na yakhkak nga ai lam chye lu ai.

Ndai zawn phone internet line pat tawn da ai majaw, phone internet line hte hpaga galaw ai lam, matut mahkai lam, online hku na jawng lung nga ai jawngma ni, gumhpraw htuk shaw ginlen ai lam ni, kunrai htet ginlen ai lam ni sha n-ga, kaga lam amyu myu hta yakhkak nga ai lam chye lu ai.