Galeng mare lapran tsang jawng hpaw hpawng galaw
Mungmyit Sinli Ga (Kachin Sub-state) ginra, Namhpakka Ginwang, Galeng mare na lapran tsang jawng hpaw hpawng hpe July shata 25 ya shani galaw la lu sai lam chye lu ai.
Jawng hpaw hpawng hta Dingda Ginwang Ginjaw Komiti Shingtau Tingnyang Up, Du Kaba Malang Myu Tsaw kaw nna shatsam mungga tsun ai hta
“Ya anhte Galeng lapran tsang jawng hpe gaw gap la lu saga ai, dai hta e anhte jawng ni hta Wunpawng myusha ni sha nrai, ndai ginra kata kaw rau nga ai amyusha yawng hpe mungdan sha kaja byin lu hkra, mungdan sha kaja tai wa lu hkra, sharin shalat ai jawng byin ra na re, ndai jawng kaw na hpaji ninghkring law law hpe ningpawt ninghpang de dat ya ai ginra tai hkra anhte jawm shakut ra na re, Galeng lapran tsang jawng ngu ai npu kata hta anhte a ginra hpe bunghkup lu ai, zinglum lu ai, kahkin gumdin lu ai masa de anhte jawm shakut sa wa ga” nga nna tsun ai.
Galeng mare hta mi kaw na nga ai laika sharin jawng hpe TNLA Balawng hpyen hpung ni hpyen n-gun hte shang wa nna, laika sharin ai lam n galaw na matu pat kau ya ai majaw, Wunpawng Mungdan Shanglawt Asuya, Dingda Ginwang Ginjaw kawn woi awn lam masan ya ai hte mare mungshawa ni kaw nna, jawng nnan gaw gap la ai re lam chye lu ai.
Hpawng lamang hta Dingda Ginwang Ginjaw komiti salang ni, jawng komiti ni, nawku hpung woi sara ni hte jawngma kanu kawa mungchying mungshawa ni yawng marai 300 daram sa du shanglawm ai hte galaw ngut kre la lu sai lam chye lu ai.
