Hpakant ginra kata kunrai manu lani hte lani grau rawt wa

Hpakant ginra kata kunrai manu ni lani hte lani grau rawt wa nga ai lam chye lu ai.

Gumshem Myen hpyen dap kawn, Hpakant de kunrai htaw shang ai lam ni hpe pat kau ai majaw, kunrai manu lani hte lani grau rawt wa nna, mungshawa ni mari sha na matu grau yakhkak wa nga ai lam, ginra masha ni kaw na chye lu ai.

Ya aten hpakant ginra hta Shan hte Nga joi mi 100000ks mi lahta, Udi langai 1000ks mi, Ba Hkrisi joi mi 20000ks, sha sau joi mi 40000ks lahta rai nna, kaga kunrai manu ni mung rawt nga ai hta nkau kunrai ni gaw gumhpraw lu tim nlu mari la mat ai re lam chye lu ai.

Ndai zawn kunrai manu ni rawt wa ai lam gaw, Hpakant ginra de gumshem Myen hpyen dap ni laiwa sai May shata kawn, kalang bai htu shadut wa ai hpang, Hpakant pru shang lam ni hpe jum tek pat kau ai majaw re lam chye lu ai.

Hpakant ginra hta ya aten gumshem Myen hpyen dap kawn, hpyen shamu shamawt ai lam ding yang galaw nga ai rai nna, gasat gala majan mung jahkring hkring byin nga ai sha n-ga, nbungli ni hte gap gasat ai lam ni mung ding yang ngu na galaw nga ai re.